A l’occasion de la fête du 20 Décembre 2020, Rivages et Patrimoine vous emmène à la découverte d’un complot mis sur pied à la Rivière de l’Est en 1799, complot au cœur duquel l’esclave Jacoto joue le rôle de meneur. Avec ses quelques compagnons ils sont l’illustration d’une forme de résistance au système esclavagiste.
Jakoto par Waro Zan-Iv
Jacoto, in lesklav la rivyèr d’lès.
Médame, mésyé la sosyété,
Zordi 20 désanm, lokazion pou nou kréol rénioné rapèl nout, pasé, nout listwar.
20 désanm, sé la fèt labolisyon lesklavaz. 20 désanm 1848. Sa i vé dabor di a nou ke pandan lontan lavé do moun té zesklav isi la rényon. Do moun té i sort Lafrik, Madégaskar, Lind, tousala ; La été ramné de fors ziskisi, la viv isi, la travay isi, desi plantasyon groblan., Mé pad’ liberté pou zot, oblizé fé kom lo mèt i di, mèm kan son fougad y lèv.
Mazine a zot Sintroz dan tan la, néna lontan. Kan mi di a zot lontan, la pa lot zour la, kan lavé sarèt bèf i pas dovan Bacal, non va, lontan, lontan ! Kan pou sort Sintroz alé Bwablan lavé zis in santié, kan po trap do lo i sava la ravine, kan bal kafé i vwayaz si la tèt do moun ; mayi, maniok sa mèm out partaz, midi é swar. La pli a ou, soley a ou, katrèr d’matin dobout.
Alorss médame, mésyé, nou lé Sintroz dann lané 1799. Légliz Sintroz kom ni wa li zordi lé pa ankor la. Na aryink in ti kalbanon pou fé la mès dédan. Do moun lé in pé fan-fané si dé trwa plantasyon.
Lépok la, néna aprosan 350 moun blan ek sink fwa plis zesklav dann lo kartié. Na kisreti i travay la tèr, kisréti i travay dan la kaz lo mèt, tousala.
Pou lo Kondisyon bann zesklav sintroz lé d’dan, lé kom in pé partou dann la Koloni. In lesklav sé in marsandiz ou la asté, in pé kom in bèf, é li la pa bezwin plis lo swin ke sa. Li lé la po angrès son mét , fé profit son propriyété. La lwa i di son prop kor lé pa ali, ziz pa son déstin. Rod lo drwa bann zesklav sé kom si ou domann lo diab lobénite.
Mé kisa i pé trouv gayar viv matin é swar sou la koup in propriyétèr ? fé son bon voulwar san di riyin ?
E pi, koman ou fé si ou la pa satisfé ? Desertin zesklav i préfèr allé maron, desertin i rod mwayin atak lo sistèm en kashièt, rod mwayin rézinbé, kit tyé lo bann mèt si i fo, kom lavé fé laba, lwin , lwin laba sin Doming.
Alorss, pou rovnir azot, médame mésyé, mwa doktob lané 1799, in lesklav i apèl Adonis i sava war so mèt pou di a li in zafèr i fé baskil listwar Sintroz. Sintroz I sra asosyé dorénavan avek ban plas kom Sin Lé ousa lavé in revolt zesklav in pé pli tar, isi mèm la rényon .
Adonis sé in kisinié. Li rakont son mèt ke in sertin Jacoto la ni vwar li ek in ta ti morso rasine dan son mouswar pou fé lo sor dosi ban blan parske i fo tié bann blan la koloni.
Lo mèt i konpran tout swit in pé zesklav lé antrinn komploté, è li la pwin tor.
Parske figir a zot , in pé avan sa, in swar, plisièr zesklav lavé rotrouv a zot la kaz in sertin Zan Mari, lesklav in madanm té i appel madanm Sansom, la rivyèr d’lès pou met o pwin zot plan.
A la tèt lo komplo néna Jacoto. In boug a pépré 23 ans, in Malgas. Son mèt néna in propriyété la rivyèr d’lès osi. E dan lo group néna plisièr zesklav lo mèm landrwa. Anparmi i trouv osi dot Malgas, dé sorsyé, Farla ek Zannecozame.
Lo plan séd’ masak lo bann blan dopi Sintroz ziska sintmari an pasan par sintsizane.
Pou Jacoto i fo profite kan ban blan lé dann téat la Komédi, Sindni , in swar, zoué avek lo ban ti morso rasine, endor a zot, é aprésa komans lo latak. Zis avan sa, lo ban sorsyé i dwa osi rant dan ron, kisa pou anpwazoné, kisa po fé la sor, tout zafer. Po li, lo plan lé dos.
Po prépar lo konplo i fo dé mwa. I fo trouv ban konplis si tout’ propriyété zalantour, apré lé bon. I komans par bril in Kaz kom sinyal . Apré tout i komans.
Vwala lo plan.
Médame mésyé la sosyété, lo plan i abouti pa.
Adonis la fé la lang ek son mèt, la fine vann la kours !
Pou kosa ? i koné pa.
Zot i mazine byin dek ban gro blan la konpri, sed’ pad perd lo tan. Vap vap, bosé lo ban konplotèr.
Promié dan tramay: Jacoto. Akoz lo ban ti morso rasine dann son mouswar li té I donn bann zesklav dan lo kartié. Aprésa lo bann boug la rivyèr d’lès: Dominic, Zan Batis,Mars, Hilarion é pi dot enkor.
Arété, Kestioné, Kondané.
Médame mésyé, Sek’ bann groblan lé an pétar aster. Sé ki fo empès atoupri in afèr kom sa i ar spas’ ankor dan la koloni. I fo i serv dekzanp.
Alorss groblan I zoué zoué pa. Fé pa lo fion. Kondané à mor la plipar. Mé plis ke sa enkor. I fo toul’ moun i vwa lo satiman, lo pinisyon.
Akout a zot byin kosa bann blan la i mazine:
Met la ban zesklav kondané dovan la gèl in kanon, épi, aprésa fé pété.
Koman di a zot sa ? Koman ou eksplik sa ? Koman ou dékri sa ? La pwin d’ mo po di in afèr parey.
Médame mésyé , listwar i di pa mantèr. La rotrouv dan la proséverbal lekzekisyon :
« Ils ont été canonnés…en présence de la garde nationale sous les armes et d’un grand nombre d’esclaves après avoir reçu les consolations de la religion. La sépulture a été donnée aux lambeaux des cadavres par les noirs de chaîne. »
Vwala médame, mésyé la sosyété.
Souvyinn a zot byin. Moi doktob 1799 lavé dé trwa zesklav sintroz la vouli rezinbé parske la sistèm lesklavaz i pé pa konvnir do moun.